九份•十分 (河畔花園) (Closed)

唔單止餐廳名好台灣，連內部裝修都好有心思。什至係筷子同牙簽筒，都不忘印上餐廳名。先叫咗兩杯飲品..... 阿里山之夜：即係蝶戀花青蘋果沙冰，餐牌上張相已經好吸引，原來實物仲正，除咗本身已經有幾種顏色，仲附上一盞燈，放杯飲品上去就會著燈，令飲品嘅顏色更鮮艷。而味道都唔錯，好fresh，好夠凍，啱哂咁熱嘅夏天，士多啤梨片都竟然係唔酸嘅。另一杯就揀咗青青草原，即係宇治抹茶牛奶沙冰，好夠份量，亦都好夠抹茶味，唔似有啲地方嘅只係夠冰凍。食麵前先食啲小食，呢度嘅台灣鹽酥雞好特別，好夠脆同唔多粉漿之餘，仲配有六種粉灑上雞度食，咖喱，芝士，原味，辣味.....，可以每次唔同口味，個人就覺得咖喱味最正。滷水拼盤都唔錯，可以揀大／細，兩個人叫個細就啱啱好，有鴨舌，雞翼，豬大腸，雞蛋，鴨腎，好味！想試細細碗麵嘅可以試呢個阿春麵線，以前係台式飲品店見過之後就好少地方有得食，好幼好淋嘅麵線，配上少許豬大腸同魚蛋粒，浸係比清湯較"結"嘅湯，細細碗，又易入口，正！另外就叫咗個呢度好似都幾出名嘅紅燒牛肉麵，比想像中豐富，湯亦好夠濃味，加點辣味，完全係台灣風味。女仔食嘅話應該可以兩個人share一碗。