翰騰閣 (Closed)

星期日走落去「又一城」嘅「柏斯琴行」，諗住玩吓人哋啲新返嘅靚結他。點知一玩就玩咗六個鐘， 仲大鑊到喺佢哋度買咗兩枝 Les Paul Custom ！雖然對好多人嚟講唔算好多錢，兩枝結他加埋最多只夠買半架車仔；但對我嚟講，開心得嚟都好肉赤！俾完錢就開始肚餓，當然唔敢出去食貴嘢，慳得就慳啦，於是就去咗曾經幫襯過嘅「翰滕閣」。結果係食得好開心，兩個人點咗四個菜式：“涼拌海蜇” ，“竹笙上湯浸白菜仔”，“枝竹火腩炆全條海斑” ，“五大隻砵酒桶蠔” 。總體味道唔錯，招呼又好，價錢更係極為抵食。（離開「翰滕閣」時回頭再想一想：淨係條炆海斑喺出邊都隨時收過千，蠔都要收過百一隻！於是個心就笑咗出嚟！點知另一半提醒我嗰兩枝結他要 UPS 返美國嘅收費，我就再笑唔出！）