上海美華菜館 (Closed)

呢間位於土瓜灣內街嘅餐館，如果唔係街坊或者專登到訪嘅人一般係唔會發現佢嘅位置，話雖如此，星期日早上八點鐘🕗未夠已經有唔少人嚟食早餐。而我呢日全日(晨早開始...)都要出土瓜灣做嘢，所以順便嚟一嚐上海早餐。由於得自己一條友，所以唔可以嗌好多嘢食，考慮咗好耐要甜豆漿定鹹豆漿，但係最終要咗甜嘅，無乜特別，早知試吓鹹嘅好過，因為比較罕見。另外我叫咗個鹹甜粢飯，粢飯真係好飽因為有好多飯🤣，而且好大嚿，入邊有唔少肉鬆同菜譜，仲有少少砂糖都幾得意，但係我嫌佢啲飯比較硬，食到尾有少少唔想食。整體來講，我覺得唔算非常好食，之前喺台灣食過啲有埋成條油炸鬼係入邊嘅好食啲，飯都比較易入口。可能我叫錯嘢食啦，有機會都仲想試吓佢個鹹豆漿嘅。