The Waffle Club (Closed)

聽聞係香港人去台灣開店再衣錦還鄉返嚟香港開分店，睇啲相似乎係打卡至上，響台灣係幾work，但返嚟香港周街都有雞蛋仔，呢間又掂唔掂呢？😏忍住條伯爵茶癮叫咗流心奶皇，雖然一啲流心效果都冇，但係軟心奶皇餡食到都幾欲罷不能，奶皇夠香但又唔算好重味唔會好膩，而且雞蛋仔個心形唔係淨係得個樣靚，個大細比平時食嘅雞蛋仔大，所以入面個奶黃餡都會比較多，食起嚟更加滿足✨不過由於格數少咗嘅關係，個份量感覺上都少咗，成三十蚊底話咁快就食完都幾唔抵食下😗 另外當日個雪糕口味係士多啤梨味，感覺普通冇乜特別，如果撞正伯爵茶味就發達喇😂