台津 (Closed)

Item: Taijin
Rating: 3
Author: 奧志雷

Taijin

6 Reviews

Taste

Decor

Service

Hygiene

Value

Tai Wo

$51-100

Taiwan Noodles/Rice Noodles

奧志雷

Level4

2.1K

Read full review

逃拳再逃拳，近來真的飲慣食慣，暴飲暴食！完全唔想郁唔想做運動，距離變肥豬目標又邁進一大步喇！由鐵人轉生為台津，走到店內坐下環顧四周，開檔都四個多月，比當初更凌亂更多雜物。裝修、氣氛、食客、等等，硬係覺得怪怪的，無緊要食左先講。我的目標菜色，從來未食過，聽就聽得多，螺螄粉！車仔麵及串燒選擇同樣少到唔知食咩好，只有餐腿蛋腸、丸類、豆品、等等。

詳細研究一下串燒餐牌，食材怪怪的，不怎樣吸引，最想食係雞翼。一場黎到都抱著試試的心態吧，雜丸腸類及瓜菜類較多，雞牛豬肉碎串，魷乾、豬乾、番薯乾、午餐肉，燒零食？酒類比食物還要多，其實想做酒吧多過食店吧！後面檯位港女我坐低到埋單只 15 分鐘，起碼聽到講投訴三四次食物麻麻地又無野食，好吵耳好嘈呀！

何解印著全日套餐，但只 12:00-15:00 時段？食客比以往多，恭喜恭喜，可喜可賀。竟然巧遇幾位美少女，食串燒飲真露，三位消滅半打有多真好酒量，不過斜住走十分有趣。

熱檸檬薑水，老闆無問我要熱還是凍，只有熱的嗎？夠薑夠熱夠酸夠甜辛辣暖胃，甜酸開胃，好舒服啊！台灣柚子蜜，飲落似柑吉蜜咁奇既？疑幻似真。宜蘭紅棗茶，梗係覺得似蜂蜜水，不過幾好飲，清甜順喉，飲完暖笠笠。

燒雞全翼，雖然製作需時要耐心等後，不過真的超然出息非凡。皮香肉嫩，雞汁牢牢的包在翼身之中，一咬一扯肉汁飛射，白肉滑嘟嘟閃令令反晒光，雞皮微脆嚥韌還吸收了香料味道，格外可口。

燒虎皮尖椒，如此演譯手法第一次遇上，劏開攤平地燒，並不是原條上陣。雖然賣相未叫吸引，幸好燒得底面同樣熱辣辣，趙落爽甜溢出大量水份，保留部份辣椒籽更加火辣刺激，撒下少少孜然粉及辣椒粉點綴，更有風味。

燒雞中翼大辣，嬸嬸我要雞全翼架！皮脆肉嫩，焦香誘惑，雞汁激射，夠辣興奮到癲。燒斯華力腸大辣，微暖濕潤不香口，皮脆肉腍不喜歡，咸腸味跟辣味完全不相襯，不好吃。

燒茄子，先入為主一心幻想會係原條茄子，竟然茄片出現眼前，真係使我呆一呆定格幾秒！趙落濕潤，以乎浸過鹽水，裡面咸咸的外面辣辣的，爽爽綿綿的質地，還可以的。燒豬頸肉，爽嫩多汁，香辣刺激，油香甘甜不膩。燒雞肉腸，熱熱味濃飛汁，皮脆而肉質嬌嫩，香香甜甜食得津津有味。

燒牛肉串，牛肉鮮甜嫩滑，落味剛剛恰到好處。燒豬肉串，原來係豬頸肉，爽甜肥美可口。燒雞肉串，鳳脂甘香，肉質嫩滑，醃味得宜。燒魷魚，居然係烤魷魚乾，完全估您唔到，我要食鮮魷架！既然送到都要照食，乾爭爭嚥韌味濃帶甜味。

古法倒蒸燒番薯乾，什麼倒蒸？倒吊蒸？我無點依兩款架喎，廚房嬸嬸靜靜雞請我食的嗎？多謝多謝。還是老闆落錯單啊？什麼來的，年糕嗎？原來係番薯乾。何解外觀跟我比狗狗食既番薯乾一模一樣既？甜味強烈嚥韌，真的似足年糕。碳燒豬肉乾，何來碳燒呢？供應商碳燒依家翻熱吧，獨立包裝豬肉乾零食的味道，黏黏甜甜無特別。

錫紙焗娃娃菜，餐牌無寫用什麼調味或烹煮方法喎。牛油蒜蓉只鋪在表面，自行撈混捲著食較好味。蒜濃而淺牛油味道薄弱，半熟清淡爽口微水的娃娃菜。人家專登想食得清淡少少，何解要加料變得重口味呢！千里送條毛，物輕情義重！好采我夠眼利啫。

蟹柳螺螄粉大辣，我在點菜紙上將花生、芫茜蔥打交叉，都怕師傅唔明，再同長髮阿妺侍應要求走蔥走芫茜走花生，送到既時候芫茜無走到，但走晒腐竹、蘿蔔、竹筍、豆角，您叫我食淨麵咩？奇怪地送兩粒豆卜比我，即係咩意思呢？筍就無喇，但食到有榨菜，您唔會覺得係筍掛？還食到有幾條木耳絲。最討厭大陸牌紅膠蟹柳，結實假甜味霸道混濁，不喜歡！豆卜香口索埋辣湯，蠻不錯。

當然先來幾口大辣湯，辣度夠沒有麻的，辣一辣後緊隨著濃濃的甜味，散發微弱的香料薰芳，湯汁不過不失。粉條沉到深處，還黏作一團，我唯有溫柔地慢慢挑散再直接狠狠地連湯吸啜入口，非常嚥韌的粉條，吸汁力強，掛湯力出眾，每啖濕潤香辣，能一氣呵成不用間斷全力地吸，暢快無比！

牛腩螺螄粉大辣，原來改左 menu，難怪上次咩配菜都無啦。份量太少，食完好似無食過野咁，夜啲再食過。再次係點菜紙上劃去花生芫茜蔥都係完全無人理，眼測有水份在碗內，似乎烚粉時去水不足，搞到辣湯淡了一點點，幸好還夠辣夠濃夠香。跌左粒蝦膠落去？唔夠專業喎。依度個
menu 無蝦膠既食材供應，那蝦膠怎來的？粉條質地超讚，嚥韌滑溜微爽，夾著辣湯大啖大啖地啜，興奮刺激一氣呵成，食得豪氣暢快！捲埋軟綿味濃無渣的牛腩更添風味。

腩肉螺絲粉大辣走芫茜蔥，嚥韌膠彈腩肉清淡咸香，豆卜吸盡辣湯一咬爆汁味美。神秘的湯汁慢慢辣上來，酸味咸味甜味辣味均香濃美味，爽滑螺絲粉夾埋腩肉筍絲豆卜大啖啜，好食到不能形容！最愛辣到死去活來的感覺，全身發熱，頭髮滴晒水，爽到震呀！

肥牛 Q 彈酸辣紅薯粉大辣走芫茜蔥，先來幾口湯，根本同螺絲粉湯底百份百一樣囉。酸辣並重，開胃醒神非常。彈滑薯粉啜得我高潮不斷，辣到頭髪都出汗，滴晒水爽到痺﹗牛味濃廿十成熟的韌韌廉價肥牛，點綴一下味道，質感蠻不錯。豆卜香口外韌內軟，索湯爆汁。嬸嬸點解紅薯粉勁短一截截既，您唔係拗斷一半煮麻？食到迭住迭住，勁唔開心勁唔舒服。人家喜歡一氣呵成大啖大啖不停吸啜殆盡，方夠豪氣暢快！螺絲粉長度就十分正常喇。依家要慢慢續少續少地夾，真係火都黎！最後整碗拿起連湯連粉掃晒入口。

過橋米線加腩肉走蔥走芫茜，跟菜牌張相真的離天百丈遠，雖然相片只供參考。清清的清雞湯底，幸好夠濃郁。碎絲咸菜淡口不夠味，豆卜浸得透徹，無油益無滾水味，索埋清湯濕潤可口。金菇爽甜，腐竹滑滑富豆香，腩肉咸鮮有趙頭。米線煮得出色，嚥韌彈滑熱辣辣完完整整無散散，掛著濃湯夾著咸菜咸肉金菇味道蠻喜歡。雖然其貌不揚冷清清，嘆完過後沒有轟轟烈烈，都還有絲絲霞想。不過搭左幾條千年紅薯粉呢，挑掉當睇唔到。

海南雞飯，泰式？越式？新加坡式？似乎係唔識海南雞飯喎。配上三色醬，泰式雞醬甜甜的，頭抽咸咸的，薑蓉最正常。菜牌張相有湯的，但現實無湯的。白飯飄著濃厚飯香，大陸米嗎？氣味獨特，跟泰國米完全不同，聞到已飄飄然，食慾大增。

海南雞不是用白切雞的嗎？眼前鹽焗雞髀香甜嫩滑多汁，雞胸綿綿味濃不乾鞋。咸味得宜帶鮮甜，跟頭抽薑蓉送飯最夾最好味道，配甜雞醬就格格不入。忍不住整碗飯吞下，人家減緊肥架，實在太可惡。早前對老闆送條毛既厚禮仍然有陰影，耐心地續片檢查清楚才能安心放膽進食。白烚娃娃娃爽脆，微弱菜甜，沾頭抽更加滋味。

新產品鮑魚麵？第七感話我知，掩飾不了的即食味道。臺津鮑魚拉麵走蔥走芽菜，豬骨湯底幾乎跟史雲生濃湯寶同出一轍，可以飲多兩啖。兩粒即食鮑魚滑嘟嘟，彈彈而味道跟鮮鮑差不多。有蒂鮮冬菇，微微菇味厚厚滑滑多水不彈。金菇，份量太少不能大注地品嚐瘦瘦幼幼爽甜。牛腩肥爽不油少少醬油醃味幾特別，唐生菜爽爽清淡食不出菜甜味道都可口滿意。似曾相識的即食拉麵，麵條煮太耐，過腍了一點點，糊口黏黏不清爽，過過口癮不過不失。

芒果布甸，不愛甜的我本想取消，抱著試一啖的心態給我吧。用叉吉吉好結實，用力切開一小啖入口，清香黏黏，竟然似層相識的味道，到底那裡食過？兒時的味道嗎？還是誰給過我的味道嗎？非常神秘迫於無奈一口接一口地想著，但最終全部落肚都找不到答案。