八八八拉麵 (Closed)

以前依個地庫舖位係遊戲機中心，依家變左做食店，坐係度始終有啲感覺怪怪、有啲局束感覺，可能因為係地牢，而且啲裝修唔夠有生氣掛 ~ 廚房作透視式，只用玻璃相隔，可以清楚望見師父們做緊啲咩。黎依度都係貪近，見係舖頭對面，朋友又極力推介，咁就試一試啦。此店特別在大部份既麵飯都有正常板及迷您版，咁唔怕食唔晒浪費啦。見侍應們比較生手，對 menu 唔熟識、餐廳運作都唔熟識，埋錯單、唔識落 order 咁啦，有待改進。煎日式餃子，幾好食，熱辣辣，肉香且有點肉汁。燒鯖魚，魚味濃，味道唔錯，但好多骨呀。落啲鮮檸汁，令魚味更提升，而且多左清新感覺，減少熱氣及油膩感。迷你叉燒飯，只係正常板既一半份量。日式叉燒軟棉棉又肥美，豬肉醃得入味，香濃美味。白飯一般，無特別，可接受啦。叉燒拉麵，睇張相以為係普通豉油湯底，點知飲落十足洋蔥湯既甜味一模一樣，睇見有大量洋蔥絲煲到出晒味、軟腍腍。但有陣好濃郁既牙菜味囉，OH NO﹗我最憎牙菜架喇。拉麵口感有啲似正版日版出前一丁麵咁嚥嚥靭靭，蛋味未算香濃，而且無彈牙感覺。日式叉燒肥美可口，唔錯。