津記車仔麵

Open Now

Now Closed

除咗兩餸飯之外，車仔麵係我另一樣喜愛嘅港式食物，所有嘢都可以自由配搭，今日黎到大埔見到呢間裝潢夠晒地道嘅車仔麵店，就一於試下。同一般車仔麵店唔同，呢度係幾餸麵就幾多錢，唔會每樣餸定價，咁就唔會唔捨得揀d靚餸啦。最後揀咗四餸麵，要麻辣豬腸+柱侯牛腩+炸魚肉春卷+蘿蔔，再加五蚊轉伊麵底。每枱都有蔥同自家製辣菜脯，按自己喜好任加，鍾意食辣嘅我當然要加辣菜脯啦。唔好以為揀多咗餸份量就會減少，四餸麵每樣餸依然份量十足，當中最喜愛麻辣豬腸，滷水豬腸就食得多，麻辣真係第一次試，麻辣汁好惹味，仲越食越辣添；牛腩夠肥美，炆得好淋好入味；魚肉春卷炸得香口，食落仲好脆；蘿蔔煮得夠淋，食落鮮甜無渣，吸埋湯更加好味。麵餐包紙包飲品，亦可以加錢轉冷/熱飲，都算抵食。