好媽媽台灣館 (Closed)

因爲睇過電視節目介紹呢間食肆，決定去試吓。今日下晝近２點去到，地點唔算旺都坐滿８，９成人，估計唔係太差。呢度裝修係小店格局，簡簡單單，有卡位，有電視睇。睇餐牌啲食物，飲品都經濟實惠。我叫咗個午餐＄３３，滷肉飯拼鹽酥雞，包飲品，我揀咗熱茉香奶茶。如果係學生仲平＄３。未上菜之前以爲鹽酥雞最多得兩三嚿，點知上菜後有驚喜，有成５件鹽酥雞。上菜速度快，唔使５分鐘，啱晒唔使急最緊要快嘅香港人。滷肉並非其他台式食店慣用嘅免治豬肉，而係切碎嘅豬肉(似係豬腩肉)，雖然略鹹，但好送飯，有誠意之作。有半隻溏心蛋，凍嘅。仲有少量椰菜。鹽酥雞好脆，好好食。杯奶茶初時飲覺得好甜，但飲飲吓可能適應咗，覺得甜度適中。好香茉莉味。佢嘅顔色同出門嘅台式奶茶唔同，青黃色，如果淨係睇顔色唔知呢杯係乜。呢個餐真係超值，以呢個價錢，唔俾碟鹽酥雞都夠份量。我老公散叫咗一碟台式炒米粉＄４５，面頭淋咗滷肉。啲米粉比一般新竹米粉幼。呢道菜都幾好食，係油咗啲。呢餐都幾滿意，食物夠地道，又抵食夾大件，會再幫襯。