點心到 MIX·大排檔

Open Now

Now Closed

呢間位於旺角金雞廣場嘅點心到Mix大排檔好受歡迎，原因佢嘅食物夠多元化又高質。呢度日抖係點心專門店，而夜晚就搖身一變成為大排檔做風味小菜。我同朋友隨意點咗幾款大排檔小菜，之後發現全場大部份食客都有點呢幾款小菜，原來咁受歡迎。冰鎮咕嚕肉份量相當多，而且仲有青黃椒同菠蘿，同樣都咁好味。咕嚕肉外面包住醋糖漿，遇上冰後凝固，感覺有啲似食冰糖葫蘆，而入面就勁多肉汁好Juicy。椒鹽九肚魚一向都係我嘅至愛，最鍾意九肚魚滑滑嘅肉質，外脆內軟嘅感覺真係好好味。飛天通菜煲帶點點嘅辣味，我就覺得夠晒醒胃，而且份量一啲都唔少，最鍾意食惹味嘅蔬菜。食完小菜就食甜品，主要都係點心款式。榴槤雪媚娘入面係真嘅榴槤肉，一咬開已經有榴槤飄香，鍾意榴槤嘅朋友一定會非常欣賞。黑金流沙包係竹炭味嘅麵包，入面再包住流心奶黃餡。記得要小心食用，因為入面嘅奶黃真係會流晒出嚟。卡通芋蓉包賣相真係非常可愛，而且佢每個包都會有唔同嘅公仔。入面嘅芋蓉真材實料，充滿芋頭香味而且微微帶甜，老人家就最啱食。呢間點心到Mix大排檔真係好有風味，而且坐得舒服又乾淨，下次想食大排檔就一定會再諗起嚟呢度。