得龍粉麵茶水檔

Open Now

Now Closed

未到炎夏，拿拿聲過嚟食晏，因為要坐街邊食，太熱的話自己都驚頂唔順。鍾意食雜錦湯檬，一碗有齊雞扒、扎肉同魚餅。薄身魚餅混有香草，少少脆口，份外惹味。湯底，冇勁口渴副作用，鹹度剛好。香菜、芽菜同金不換等配料都多，用湯匙隔開的青檸同紅椒粒，先係極品。青檸向來係至愛，見到佢喺度已經開心；紅椒粒夠辣，即時令個湯醒神晒。碗麵份量唔大，如果好肚餓，叫個香茅豬扒雙蛋飯就穩陣d。篤爛蛋黃，蛋液拌勻白飯，由於豬扒係碎上，好輕易就可以將豬扒同飯二合一入口。鍾意食飯要多汁的朋友要留意，呢碟飯係堅冇汁，豉油都係得好少。自己唔好多汁，所以接受到，反而享受到豬扒同蛋的味道。香茅豬肉撈檬的豬肉非常入味，肉汁豐富，香茅味濃，大喜。撈檬汁，西貢越南真味的出品更佳。