8Five2 Restobar

Open Now

Now Closed

尖沙咀不嬲都好多餐廳，但係都比較少去食墨西哥菜，今日食嘅呢間唔單止嘢食有特色，環境亦都好chill，適合同朋友收工過嚟飲酒吹水放鬆吓。辣食注意!前菜叫咗個吞拿魚伴厄瓜多爾醬，serve得非常之型，拎起隻碟會有煙霧出，適合打卡，本身諗住前菜應該酸酸地，點知原來係辣㗎，仲要係食完之後會滲出嚟嗰種辣味，不過好惹味。跟住叫咗素菜墨西哥脆玉米片，份量都唔細，兩個人分就差唔多，nachos 配合埋佢嘅Salsa 醬同芝士醬，加埋牛油果醬或者sour cream，好適合一路傾偈一路食。素菜有紅椒、黃椒同埋青椒，令到成件事冇咁罪惡健康咗。然後同朋友叫咗一個墨西哥卷餅share，餡係羊肉加豆，因為大家都唔算好大食，食半個應該夠飽㗎喇，因為入邊都有啲飯，但留意返個卷餅都係辣嘅，今次就應該係tabsco嗰隻辛辣。如果想味道再豐富啲，可以點埋鮮番茄醬。甜品我哋就叫咗一個椰子雪葩，都唔細㗎，所以都係兩個人分。食落去清清地，好適合一洗食咗成餐嘅辣味。