Hunger Point (Closed)

墨西哥會令你諗起乜嘢，好大頂帽，結他，抑或係辣椒醬？我就會想起 Taco。Happy Friday，lunch 就梗係要搵啲好嘢食開心下，有乜會好得過熱情嘅墨西哥。之前係駱駝漆行上行落都見到呢間餐廳，一直想試吓但啲朋友次次都話食其他嘢。今日一支公，自己話事，出發！又係好貪心咁叫好多嘢：Taco set ，包括墨西哥辣雞、豬腩肉、玉子豆腐。三款都好食，我特別欣賞豆腐個醬汁，配上炸過嘅豆腐，素菜來講好香口但唔會油膩。蕃茄濃湯配多士，出奇地好味，一定要試。洋蔥圈、芝士nachos，呢兩樣就普通。蝶豆花lime soda，酸酸地，醒神又唔會太甜。簡單講，值得大家試吓。