龍德樓 (Closed)

今日去到勝利道，原來有好多餐廳，好多間想試，不過近排食西餐食到厭左，所以選擇中餐。見到間餐廳個名好有”傳統中菜館“感覺，所以就去試吓。睇吓餐牌下先，選擇都好多，仲有好多煲仔菜色，我哋最鍾意就係食“煲仔“，趁夏天來之前，梗係要食吓啦。仲有燉湯，有幾款可以揀，價錢合理，叫咗兩個燉湯，再睇吓食乜嘢。日月魚燉赤肉，材料充足，味道清甜，火候夠👍🏻我哋嗌左兩個小菜，一個煲仔飯，當然全部都係煲仔菜🤣第一煲仔菜大馬站 - 好香蝦醬味，材料種類都幾多，燒肉，蝦，魷魚，豆腐，冬菇...送飯一流。第二煲仔菜鮑魚花膠尚品煲 - 材料超多，好新鮮，鮑魚，金蠔，魚柳，花膠，豆腐，菇...味道唔錯，清清地，雖然賣相同第一煲仔有啲似，顏色上，但係食落完全唔同味，有鮮甜嘅味道。第三煲仔飯北菇滑雞煲仔飯 - 材料份量多，呢度啲煲仔飯同傳統嘅係唔同，佢哋係蒸飯，佢哋個飯底，有好多唔同嘅菇類一齊蒸，好有味道，睇落唔係好大煲，但係份量原來都幾多。餐廳唔大，食物質素都高，店員友善，中菜來說，都幾抵食，可以一試👍🏻