百味川 (Closed)

依家真係好少出街，今個星期六終於出左葵芳一轉買啲野，跟住就諗住去睇下葵廣有咩食買，但望望鐘原來仲係五點，仲趕得切堂食，跟住喺一樓見到百味川啲野食都幾吸引 就快快手衝入去坐低食碗麵先！不過我入到去就發現！其實我應該買外賣！！因為佢地依家六點後 外賣自取八折！好抵！！好講返我食左咩～我叫左個麻辣牛魔王淮山麵，炸墨魚丸同手拍青瓜麻辣牛魔王淮山麵：牛魔王包含左爽口嘅牛肚，入味嘅牛腩，軟稔嘅牛筋，而麵底都有數款可供選擇～～呢次揀左外面比較少見嘅淮山麵，原來淮山麵係用淮山磨粉再加上小麥粉整成嘅，口感比米線硬身，麵身較幼，而湯頭亦有數款可選，呢次揀左惹味嘅麻辣，仲有不同辣度可供選擇，呢次揀左最少嘅微辣，食落麻味唔重，辣味真係做到微微辣，下次有機會可以進級挑戰更高級嘅辣度。炸墨魚丸好彈牙，同埋即叫即炸好新鮮；至於個手拍青瓜好爽脆，而且好多辣油，鐘意辣既一定勁鐘意 ！最後再加左杯恐龍華田，其實就係凍華田再喺上面曬上胚芽同埋可可粉，令到華田嘅味道更豐富，好有口感～～～