鵞莊燒鵝工房 (Closed)

平日 lunch time 間唔中都會過嚟大有街搵食，早兩日同同事過去食車仔麵，見到新科技廣場地下新開咗間「鵞莊燒鵝工房」。店舖以外賣燒味為主，不設堂食。睇咗門口嘅易拉架，有乳豬、燒鵝皇、香妃雞、燒腩仔、叉燒、金沙骨...等等，另外亦有燒味飯盒供應，選擇都幾豐富。睇咗佢哋嘅宣傳單張，原來店鋪嘅燒味係現址製作，而且仲歡迎分銷。另外客人亦可以用手機掃 QR Code 預先落單，去到就可以攞，唔使等。反正今晚未諗到食咩，放工一於過去買盒燒鵝返屋企加餸。點咗燒鵝皇下庄，睇下鵝皮嘅顏色幾靚仔，赤紅帶光澤，皮肉飽滿，雖然拎到返屋企先至食，但係外皮仍然酥香脆口，油脂豐盈不膩。鵝肉亦有水準，吃落有濃郁鵝味，質感嫩滑，而且香料味唔會太搶，恰如其分地將鵝香帶出，令人吃得人津津有味！