Homeland (東昌街) (Closed)

一直都好想試試Homeland，冇諗過第一次幫襯會係嗌外賣🙈 因為疫情同限聚令，餐廳推出咗好幾款外賣套餐，以優惠價錢食到高質小店嘅美食真係又抵又吸引呢！Homeland會每日新鮮製造手工意粉，食落口感好煙韌有蛋香；卡邦尼有鹹香嘅伊比利亞煙肉粒同火腿，加埋隻溫泉蛋令味道更濃厚，雖然份量唔多但食完好滿足。煙三文魚沙律有藜麥特別健康，酸味味嘅黑醋令沙律食落唔會太寡，好開胃。另外跟餐嘅南瓜湯都唔錯～Pizza係薄批嚟，餅底烤得好脆就算外賣都冇影響質素，用咗巴馬臣、Mozzarella同車打芝士，肉醬同Pizza好夾又冇普通茄醬咁單調，依個配搭幾好呢！Homeland最近準備緊喺大角咀開分店，希望快啲有機會堂食再支持下啦！