樂天大喜屋 (Closed)

旺角創興廣場成棟都係美食，而係電梯一上就會見到成層都係樂天大喜屋放題，佢既裝修係幾特別，分左幾個區域咁，自助區同飲品區好似要出左餐廳門口咁，但其實成層都係佢地既。放題黎講刺身都係個啲，但佢既三文魚係厚切，叫咗幾round都係咁厚，赤蝦刺身都幾大隻。熟食方便，呢間算多選擇，試咗幾好食嘅有牛舌，鰻魚，黃金燒蠔，金蒜蓉粉絲蒸扇貝，扇貝係好大隻個啲，又粉絲底，幾正。泰式咖哩軟殼蟹，個咖哩係靈魂所在，好似啲茶餐廳嘅咖喱豬扒飯既咖哩咁，除咗軟殼蟹之外仲有兩塊麵包，幾好食。香草生油煮鮮大蜆既蜆真係好大隻。最後食埋個鮮蟹粥，蟹既份量都幾多，粥底都幾綿。最後最後要講講佢既羊架，唔知點解咁好味，醃得入味之餘羊肉又唔好柴，又唔會好肥，自己都encore 左四五次。價錢黎講$248加一，大部分既放題都係咁上下價，但佢既熟食係幾出色。