肉肉強食 by 鋒膳 (Closed)

認識呢間舖頭係因為有個Youtuber Data介紹佢平價吉列豬扒餐，只需要20蚊份，但每日限量30分。不過我今次去試嘅係佢嘅鋸扒晚餐，因為見到佢價錢好吸引，啱曬我呢啲食肉獸。可能係平日去夜晚人流唔多，地方都算大，啲枱布好有特色(紅白格仔枱布)，有舊式嘅港式豉油西餐格局!我幾鐘意啲枱都算幾闊落， 坐得都ok舒服。睇睇餐牌， 肉類嘅價錢都非常之吸引。雞牛豬羊魚都有。我就揀咗個 沙丹豬扒;我老公就揀咗個西式牛柳 。如果你加22蚊就會有餐湯，麵包，甜品， 飯/意粉/薯條 同嘢飲一杯。 服務員態度都幾好， 估佢唔到唔使加一! 隔咗一陣我哋兩份扒餐都好快上，我叫咗蒜蓉汁，但係原來我個沙丹豬扒上面仲有一堆蒜蓉， 好surprise, 因為如果要 蒜蓉粒 出面餐廳一般要另外加錢。個豬扒兩大塊仲有一隻煎蛋，成份餐都好大份好扺食!豬扒食落幾嫩口，唔會霉啄啄。而我先生個牛柳餐佢都話ok可以收貨。飲埋湯，食埋甜品，飲埋杯熱飲，成個肚飽到就嚟爆。兩個人，人均都係一百蚊真， 真心扺食。 下次會再嚟試埋佢個雜扒餐😋