江南瀨粉 (福榮街) (Closed)

約左朋友係深水埗見面，佢介紹話呢間小店既水餃好食，所以就過左黎試下。話時話都好耐無食鳳城水餃，多數係街食粉麵都係食雲吞多，唔係好多地方有賣鳳城水餃，所以我都幾期待。平日未到夜晚食飯時間，人唔算好多，但keep住都半滿狀態。我地睇menu揀左好耐，叫兩碗又驚太飽，所以最後叫左四餸瀨粉加份韮菜豬紅share。先黎韮菜豬紅，豬紅份量好多～～～韮菜當然都好多啦哈哈。勁鐘意食豬紅既我覺得好好食～個湯底稍為咸左少許，不過豬紅幾新鮮，唔會一patpat，食落口都幾香。然後到四餸瀨粉，佢既鮮製瀨粉同平時快餐店食到既唔同，佢係比較粗，無咁透明，似係彈牙版既烏冬咁。每條都粗幼不一，睇得出真係小店自家製，呢種感覺幾好，唔係出面咁易食到既野。鵝腸一啲都唔腥，清潔得好乾淨，亦都夠彈牙。竹笙正常發揮～唔係用漂白哂既貨，唔錯。紫菜都比得唔算少，而且處理過，完全唔會有腥味。水餃真係無介紹錯，大大粒，多餡，係木耳同蝦都多呀！！而且水餃皮唔會易爛，夠新鮮聽聞都係自家製，不過一份得兩粒，早知叫兩份啦！跟餐加左杯檸樂～為便宜抵食既一餐作結哈哈。