月居酒屋

Open Now

Now Closed

朋友揸開車，諗住去食飯，於是決定揸車去大坑睇吓有咩好食。喺附近搵車位泊車見到有間月居酒屋門面唔錯，於是入去試吓。入到去餐廳就送上汁煮枝豆，平時都要另外叫，呢個係送俾我哋食，非常有誠意。叫咗唔同野食試吓，前菜方面我哋叫咗日本高糖度蕃茄，鹽焗銀杏，烤鱈魚乾及真鯛配Wasabi漬物。蕃茄好似生果咁甜非常開胃，鹽焗銀杏軟糯， 鹹香十足， 非常送酒，另外真鯛配上Wasabi漬物，口味清香鮮甜。另外亦試咗壽司拼盤10貫，火炙壽司3貫及葉血引和帶子刺身。葉血引平時好少日本餐廳有入貨，新鮮質感爽口彈牙，好香魚味。壽司拼盤用上日本海鮮「左口魚 鯛魚 牡丹蝦 赤貝 大拖羅 中拖羅 赤身 沙甸魚 梳子魚 日本海膽」食材高級，鮮甜無比。 火炙壽司亦有日本和牛左口魚邊及大拖羅，油香滿滿，十分推薦。另外亦試咗幾款燒物煮物，包括燒牛肋肉，鹽燒白鱔，月見雞肉棒，燒雞翼，薑汁煮廣島蠔。師傅串燒功力十足，外皮香脆唔會過火，將肉汁鎖死。最後仲叫咗個天婦羅雜錦拼盤，份量十足，炸衣唔會過厚。餐廳非常適合三五知己坐埋一齊摸住酒杯底傾偈食飯，大家去開大坑千祈唔好錯過。