芝加哥串燒 (美豐花園) (Closed)

平時三五知己, 想搵個地方飲下啤酒, 食下串燒, 洗費一啲都唔平, 今日竟然喺大埔搵到間價錢親民, 裝修有格調, 食物質素仲非常好高嘅串燒店, 實在不得不同大家分享一下！呢間小店, 店面細細, 選擇之多絕對令你意想不到！豬、牛、雞、羊、海鮮、蔬菜、佐酒小食樣樣齊。酒精類選擇亦相當豐富, 威士忌、清酒、啤酒、仲有唔少品牌嘅手工啤俾你揀。餐廳內仲有大電視, 適逢世界盃, 睇波嚟呢度就啱曬喇。呢個雜菌, 一打開, 混合牛油、芝士、野菌嘅香味四溢, 未食已經胃口大開。蠔燒嘅時間掌握得剛剛好, 肉質肥美, 保持嫩滑。蠔身表面加上少少蒜蓉、調味唔會over, 保留蠔嘅鮮味。扇貝一份有2隻, 40蚊都唔使, 仲幾厚肉添, 相當抵食。呢個羊架, 係我的最愛！肉質柔軟, 羊脂極為豐富, 入口帶點羶味, 食完仲要encore！牛仔骨肉味濃厚, 肉汁豐富。燒菠蘿清新醒胃, 不過一小塊果肉不多, 如果切大片一啲, 口感應該會更佳。熱騰騰嘅美食配上冰凍啤酒, 簡直係最佳享受。