陵發潮州白粥 (Closed)

三月十四都同兩個麻甩仔去打冷，就知小編仲未揾到我既浩南。不過唔緊要，因為中西意日韓入面，小編偏愛中菜，例如係酒樓、打冷、上海菜等，食好嘢仲實際啦。今次三人行去左太子陵發打冷，但適逢小編岩岩病完冇乜胃口，我地只係叫左幾樣嘢。如果小編戰鬥力回復100%，一定可以試多幾樣嘢。首先就係必食的蠔仔粥，啲蠔仔真係好飽滿，有半隻我既食指咁大粒，好鮮甜。但成窩粥既湯水就估左一半，粥料就比較少，大概每人兩個碗仔既份量，但蠔仔都有三十粒左右。記得menu上有幾個size, 個樓面叔叔就話三個人叫第二大既就ok，我建議可以叫大一個size，因我覺得呢樣係最好食，同埋量真係唔多。仲有最重要係，如果你同小編一樣唔鐘意食莞茜葱，一定要走青青青，重要既嘢講三次。另外就叫左炸蠔餅，好食，好鬆脆，啲蠔係一樣咁大粒，係食過既蠔餅中最好食既(利申: 小編好少食蠔餅)。仲有叫左鹵水拼盤，揀左鵝腸，墨魚同腎，鵝腸係最好食，但一百蚊嚟講，就份量少左啲。最後仲有碟油菜，好油。因為唔記得每樣幾錢，所以唔特別提啦，總之埋單就330，冇加一的，總括來講質素不錯。