京滬佳餚 (亞太中心) (Closed)

今日同朋友去尖沙咀漢口道做嘢，睇到呢一間店舖相當熟悉，以前喺銅鑼灣食過，難得遠在天邊近在咫尺，梗係拉埋朋友入去試。入到去感覺好舒服，乾淨企理。京滬香酥烤鴨，烤得啱啱夠火候，皮夠酥脆，肉帶汁，鴨香味濃。花雕醉雞嘅酒味清香，雞肉嫩滑，雞件斬得完整，完全冇碎骨。家常紅燒豆腐完全帶有傳統手藝嘅味道，豆腐煮得好入味，帶點微辣，開一開個胃口～食到咁上下，上咗一碟魚湯鮮腐竹浸時蔬真係啱啱好用嚟清一清喉嚨，湯頭清甜，腐竹同樣入味！嚟到招牌小籠包，果然冇令我同朋友失望，皮薄餡靚，食落多汁，配上特製嘅薑醋非常好味。魚子醬燒賣嘅肥肉唔多，肉質好厚彈，加上魚子醬更添一份鹹香味。芝士脆蝦卷稱得上為出色，卷皮炸得脆卜卜，連多餘嘅油分都冇，食到啖啖的蝦肉同埋濃郁嘅芝士味，令人回味無窮。京滬香蔥煎餅做得絕對不油膩，而且咬落鬆化，層次多，夠香脆之餘，香蔥嘅味道相當清香。食上海菜又點少得一碗京滬擔擔麵，麵條煙韌有彈性，配上花生肉碎微辣，掛汁力唔錯，湯頭濃郁至極，但係完全唔係死鹹，令友人食不停口。以上介紹嘅菜式全部都係來自四人套餐，只係$468就有九道菜式，真係平靚正，所有食材好有質素，服務態度一流！