天丼

Open Now

Now Closed

平時去屯市，多數係食壽司郎或者拉麵，上星期無意中發現有天丼天婦羅，上次因為落場時間，所以冇緣食。今日終於有機會食喇。11點半去到，岩岩開門，唔駛等位，即刻可以入座。餐牌大約有8款天丼選擇，另外仲有幾款定食。我地一心想食天丼，所以毫不猶豫揀左巨星天丼。有虎蝦，帆立貝，紫菜，菇，魷魚，蟹柳各一，仲有兩條四季豆。店內已張貼告示，天婦羅即叫即炸，所以需要等15-20分鐘。落左單後計，真係剛剛等左20分鐘就到。賣相豐富，初初以為飯會比較少，但食完都好夠飽。不過汁略為少，枱上有天婦羅汁，可以自己添加。各款炸物都好新鮮，特別係虎蝦，口感爽口彈牙，炸漿岩岩好，唔會好厚，完全食到虎蝦鮮味。魷魚就比較遜色，太淋，冇乜特別。如果想食平價天婦羅丼飯，呢間值得推介，$100唔駛就可以食到天婦羅。