Orange Elephant Thai Restaurant (利奧坊) (Closed)

大角咀真係有好多泰國餐廳嘅選擇，今次揀左Orange Elephant，餐廳由博文街搬咗去利奧坊，地方寬敞舒適，燈罩非常特別，用藤做成扇形。生蝦刺身 6隻生蝦好大隻，入口非常爽口，上面有生蒜頭同埋辣椒粒，可以沾秘製青色泰式辣汁，口感豐富。雜錦串燒有豬、牛、雞各2串，上枱熱辣辣，肉質鮮嫩，沙嗲醬汁滑順，有花生嘅香味，唔會太辣。原個菠蘿海鮮焗飯用菠蘿殻做器皿，好有特色，材料豐富，有青口、魷魚、蝦，仲有酸酸甜甜嘅菠蘿粒，香氣十足。芒果冰特飲特別之處係每一啖飲到沙冰之外，仲有大大粒芒果粒，非常香甜。番石榴冰同樣亦高質，口感冰凍滑溜透心涼, 解渴之選。