A.O.C Eat&Drink (Closed)

如果唔係朋友介紹，都唔知灣仔有呢間隱世法式小店。轉左入巷仔，行到最尾就別有洞天。餐廳半開放式，出面都有枱櫈，但呢日好大雨⋯ 坐入去聽住音樂，望住外面大雨，都幾有法式情調。店內大約有7張雙人枱 (4張高枱)，同埋大約5個吧枱位，但都唔會坐得好迫。 叫左Veal Bone Marrow做頭盤，Bone Marrow表面加上crumble烤得金黃香脆，加埋骨髓軟嫩，加上香料同麵包，啱啱好可以中和油膩感。 Duck Confit係另一種我好鍾意既法國菜，但可能因為係功夫菜，要用鴨油浸住再低溫烤焗10個鐘。一切下鴨腿已經覺得無叫錯，鴨皮夠酥，鴨肉好冧，真係唔使用力，一撕就得，入口即化。由於鴨皮都有一定油脂，所以配埋紅酒醬，同埋蘋果、梨的酸味，可以清新一下味蕾。另外叫左Mussels，蜆肉夠大粒，白酒忌廉加上少少thyme, 點薯條食超好味。 最後忍唔住叫左個甜品：Napolean。因為朋友唔甜野，本身都怕會食唔晒，不過個cream無死甜，有隱約的vanilla scent。最後都成個清晒！ 當晚都見到有幾枱法國客人，廚師重會親自出黎問佢地覺得食物如何，聽到佢地用法文交談，加埋法國菜，更有味道。