彩興來來火鍋 (Closed)

天氣又轉凍，又係時候去打邊爐。彩興來來火鍋位於 帝景灣 商場裏面雖然地方唔算好方便，但係一樣座無虛設，正所謂有麝自然香。餐廳地方唔大，但係有好多卡位，坐得比較舒服，而且唔會煙霧濔漫。火鍋湯底選擇好多，有招牌家鄉鴨煲，鮮鯇魚煲，黃金雞湯等等。最後我哋揀咗一個清清地嘅魚湯，唔想太熱氣。打邊爐除咗個湯底，醬料都好重要。呢度嘅醬料有好多選擇，九宮格一樣，可以俾你因應自己嘅口味混醬。鯇魚放左入鑊炒左幾炒後，再加入魚湯同紫蘇葉煲左一陣，一滾就可以撈D魚上嚟食同埋飲湯。魚湯非常鮮味，好甜，有紫蘇葉嘅香味，唔會感覺到腥，鯇魚煮得啱啱好，好滑。黑松露餃好大粒，好足料，入面有黑松露，蝦肉，豬肉，冬菇，有多重口感，非常好味。四色手打丸好彈牙，可以食到唔同既味道，唔洗咁齋。以呢個價錢來講有咁多粒，非常之抵食。芋頭件炸過之後，一煮就變得好粉，再點一點醬料就非常入味，好食到暈。稻庭烏冬好Q，配埋肥牛一齊食，非常之正，今餐真係食得非常之飽。