稻庭養助

Open Now

Now Closed

緣之所致黎到稻庭養助‬ ，作為基層一份子當然覺得貴貴地，但食完就乖乖付賬  地點黎講我覺得有少少唔就腳，起碼同鐵路一d都唔近。話雖如此，店內不乏捧場客，而且仲係日本人！既然日本人都當係飯堂，質素肯定有番禁上下，而且味道唔會走樣得去邊。見到好多食評話冷烏冬好食，一於試一試雜錦天婦羅冷烏冬雜錦天婦羅冷烏冬香港周圍都有，但十有八九都好難食，但呢個真係不得了。麵身有別一般烏冬，比平常幼同扁身，開頭以為好似上海麵咁，點知食落爽滑彈牙，一夾上手竟然好似笨豬跳條繩咁彈法   天婦羅有魚、豆、藕片、獅子狗同蝦。炸漿脆又薄，炸得夠香又不失食物本身鮮味，仲擺到成件藝術品咁俾你欣賞～雖然定價唔低，但好野始終可以吸引到有要求的一班人，推介推介。