泰好食 (Moved) New Location

黎之前啱啱食左少少野，唔太肚餓但因為要參加聚會所以點都要食d野先，本來想去金鳳，點知去到佢地話收7點，仲sell我地買埋d蛋糕，最後當然無買轉陣黎到呢間泰．好．食！鋪頭門口有一名女侍應坐係度，門口用厚重的透明膠簾做遮擋，女侍應見我地行過黎有幫襯就幫我地揭開塊膠簾，情形就好似去「架步」咁，好攪笑！店內只有一位客人，好清靜，坐低唔知有咩好食又見無咩時間，有Set喎，男朋友叫左個A餐，泰色臘腸蝦炒飯跟青檸梳打，我見唔太餓就叫個沙律啦。小店黎講佢都有好多選擇，我最後要左個木瓜沙律跟熱咖啡。熱咖啡，超難飲，好酸，雖然我都無期望過會好飲但質素真係幾差下，男朋友的青檸梳打都唔見得好，佢話係一杯有少少氣的「糖水」， well……等緊食物的期間聽到炒野聲，應該係整緊個炒飯，好似好有鑊氣咁，幾分鐘後果然係個泰色臘腸蝦炒飯，夠熱，感覺唔錯，不過飯唔算炒得乾身，睇落又唔係好見到d臘腸。我個木瓜沙律，唉，一上檯我先記起泰式的木瓜沙律係用青木瓜而唔係平日橙紅色的木瓜，即刻唔想食，雖然佢地d青木瓜絲唔太酸，但我本身唔鐘意個味而且又唔夠凍，怪怪地，最後都係男朋友清左佢，無下次lu。