BEP Vietnamese Kitchen 越灶 (Closed)

星期日晚要做野已經慘㗎啦，竟然晚餐都要喺中環搵食，既然咁慘，就決定對自己好啲，行遠啲去Soho食啦。搭扶手電梯去到最頂，落到去就見到呢間食越南野，入面人頭湧湧，好似幾正常喎。睇返餐牌，價錢比較合理，都係$80起跳。入到去坐低，侍應好快就比杯水我，幾特別嘅地方係，啲水係有薄荷味嘅，因為水入邊放咗薄荷葉。望吓Menu，想試吓啲平時冇食過嘅嘢，所以揀咗檳榔葉牛肉卷撈檬，見到可以加$10轉朱zoodles，之前喺網上見過zoodles係可以減低澱粉質攝取量，食完又會覺得飽嘅，即刻點黎試下。黎到見到都幾大份，即刻落我最鍾意嘅撈檬汁就起動了。第一次食檳榔葉，原來味道都幾似紫菜，幾好食喎。Zoodles原來係一大堆切碎左嘅青瓜，冇好似noodles咁一條條，覺得自己食緊一個巨型嘅沙律多啲喎。埋單$88加一，都算幾抵食啦。