梨滿園韓國料理 (Closed)

今晚媽媽唔煮飯，唯有同細妹一齊食晚飯，見到一間喺女人街樓上嘅韓式餐廳好似平平地，一於上去試吓。上到去見到餐廳都有幾枱客人食緊，又唔算冷清喎。落完單會送上前菜，每人兩小碟，我就揀咗泡菜同白蘿蔔絲。主菜叫咗一份燘牛肋骨，呢味餸係我食韓國餐廳最鍾意食嘅其中一味。燘得好腍、好入味，而且每一舊都好厚好大塊，正啊！仲叫咗一個八爪魚鍋，勁大個啊，裡面有好多唔同嘅材料，泡菜、節瓜、蘿蔔、豆腐、豆芽、八爪魚，仲有年糕。食到最尾仲可以加一個韓國公仔麵，吸收咗泡菜湯嘅公仔麵真係完美嘅句號啊！