御廚煎餅 (Closed)

一向好鍾意食台式煎餅(台灣人叫蛋餅)，但喺香港實在搵唔到好食嘅煎餅，終於喺灣仔搵到喇!雖然30蚊一客煎餅唔算特別平，但性價比幾高！呢間除咗餐單選擇多，而且仲係即叫即做，食物質素高之餘，仲可以揀素食，我點咗一客素菜煎餅，餅皮煎得香脆而唔油膩，裡面嘅蔬菜咬落脆卜卜，非常新鮮，加咗蛋同芝士配合本身嘅沙律醬，就更加香口同味道豐富；如果鍾意食肉，個孜然羊肉煎餅亦好多客人點，賣相非常好；呢度嘅食物份量亦好足料，以一個午餐嚟講，一客煎餅應該夠食。 美中不足嘅地方係，由於係即叫即做，午餐時間人流多嗰陣，就要等好耐，而且舖面好細，以做外賣為主，客人只可以喺外面企住等，夏天會有啲辛苦。