海南雞公主 (Closed)

喺上環返工三年幾，附近既餐廳都食到悶悶地，所以特別留意新餐廳。有人行過摩利臣街，見到有間感覺清新既小店，望一望餐牌，見到午餐大約係$50-60，價錢都算合理，就入內一試。第一次黎當然要試下佢招牌既海南雞飯，飯可以揀雞油飯、白飯或者五穀飯，醬就有三款，包括麵豉醬、海車雞醬同埋薑蔥醬。我揀左油飯、特色麵豉醬同海南雞醬。飯盒有三部分，先食個沙律，呢個冇得揀，唔知係咪日日換款呢。今日係青木瓜沙律，酸酸辣辣咁，唔食得辣既我覺得還好接受到，不過呢個份量夠喇，再多少少就頂唔順。海南雞份量都幾多，有兩層，有肶位亦都有胸位，不過全部都好滑，亦都有雞味，唔會係雪藏感覺。麵豉醬有少少辣，雞醬就係甜既，我鐘意先食辣，後食甜，有兩個醬呢個idea幾好，令味道更豐富。油飯夠熱，但係略嫌硬左少少，特別係凍左之後，我會鐘意軟D。甜品係一件椰汁糕，上層係軟淋淋既白色椰汁糕，下層少少透明，口感似大菜糕，有少少咸味，味道正宗。堂食可以一邊望下街景，感覺都幾寫意。$62喺上環唔算特別貴，不過主打外賣黎講亦唔算平，如果可以包一小杯飲品，或者甜品有多一舊就感覺抵食D。