半島冰室

Open Now

Now Closed

半島冰室算係呢到嘅地區美食，好受歡迎，次次經過都有人排緊隊。排隊嘅途中可以順便睇下牆上嘅餐牌有咩食，最好決定埋，因為佢呢度點單速度不遜色於澳牛。我坐底一秒就有位阿姐問我食咩，我叫佢俾時間我睇睇Menu，佢行開咗幾秒又返嚟問食咩。所以一早決定好食咩好重要，但好彩我都喺嗰幾秒之間決定到食咩。我點咗下午茶餐嘅芝士煎蛋豬扒包，連埋杯凍檸茶係34蚊。落單速度快，上餐速度亦快，幾分鐘阿姐就放低咗碟蜘蛛包(芝豬包)，我覺得個簡稱都幾搞笑哈哈。面包熱辣辣，厚厚一塊嘅豬扒上面係半溶嘅芝士同煎蛋。材料簡單唔花巧但睇落已經好吸引，連坐我對面嘅友人都忍唔住問我可唔可以俾佢咬一啖個包。豬扒雖厚但唔韌亦唔乾，夾埋溶咗嘅芝士同熱辣辣嘅包真係覺得好食！唯一唔好嘅地方係個包太熱，建議攤一攤先好食會好啲。個包入面煎蛋冇乜驚喜，蛋邊唔夠脆，蛋黃對我嚟講有啲過熟，如果再流心啲更好。34蚊嘅價錢連嘢飲係香港嚟講唔算貴，食物質素絕對對得起呢個價。期待下次去試埋佢其他菜式。