Video
Read full review
2024-09-12
452 views
冇寫食評好多年了，但係早幾日去完一間陶x飲茶，平均每人百幾二百蚊難食到飛起，尋晚再嚟三好，一比較之下真係要為呢間小店寫一寫食評🙏🏻小朋友喺呢個商場功課輔導，終於有間似樣啲嘅食店，等我可以接佢嘅時間食埋飯先返屋企啦👍🏻由於新開張，初初都唔敢亂推介，試咗多幾次先敢確保佢嘅穩定性👍🏻因為唔係每次都影相，所以有些推介係冇相的。環境：入到店舖，個場掛咗好多「好」字嘅標句，入到嚟毎句望吓讀吓加強正能量😝好配合佢個名👍🏻以呢類型嘅點心店嚟講都算坐得舒服了，木製傢俬，地方乾淨。服務：一開始嘅時候覺得佢啲夥計雖然好努力咁，但係有啲新手，經過好似差唔多兩個月之後，覺得佢哋上手咗好多，同埋都有禮貌，執枱都快手快腳。食物：我哋通常先叫一壺人蔘烏龍茶，因為好少地方有，再叫仔仔最鍾意嘅必食點心，之後先每次試啲其他點心，暫時仲未試齊咁多款。仔仔必點嘅有：1. 椰皇燉湯👍🏻（椰香味濃，味道應該冇味精），初初仲有其他湯，不過轉左餐牌之後只剩下椰皇燉湯。2. 炸鮮奶👍🏻（個皮鬆脆、入口即化，鮮奶部分甜度適中）。3. 大大隻鵪鶉蛋燒賣👍🏻（肉質剛剛好絕對不會是爛啤啤的）。4. 棗皇糕👍🏻（以往只覺得利x的棗皇糕好食，而家就
小朋友喺呢個商場功課輔導，終於有間似樣啲嘅食店，等我可以接佢嘅時間食埋飯先返屋企啦👍🏻由於新開張，初初都唔敢亂推介，試咗多幾次先敢確保佢嘅穩定性👍🏻因為唔係每次都影相，所以有些推介係冇相的。
環境：入到店舖，個場掛咗好多「好」字嘅標句，入到嚟毎句望吓讀吓加強正能量😝好配合佢個名👍🏻以呢類型嘅點心店嚟講都算坐得舒服了，木製傢俬，地方乾淨。
服務：一開始嘅時候覺得佢啲夥計雖然好努力咁，但係有啲新手，經過好似差唔多兩個月之後，覺得佢哋上手咗好多，同埋都有禮貌，執枱都快手快腳。
食物：我哋通常先叫一壺人蔘烏龍茶，因為好少地方有，再叫仔仔最鍾意嘅必食點心，之後先每次試啲其他點心，暫時仲未試齊咁多款。
仔仔必點嘅有：
1. 椰皇燉湯👍🏻（椰香味濃，味道應該冇味精），初初仲有其他湯，不過轉左餐牌之後只剩下椰皇燉湯。
2. 炸鮮奶👍🏻（個皮鬆脆、入口即化，鮮奶部分甜度適中）。
3. 大大隻鵪鶉蛋燒賣👍🏻（肉質剛剛好絕對不會是爛啤啤的）。
4. 棗皇糕👍🏻（以往只覺得利x的棗皇糕好食，而家就多埋呢間三好，有日帶咗公公過嚟食，公公話好食過利x嘅棗皇糕，唔知遲啲過年嘅時間佢會唔會有得一底底咁買呢😋咁我就唔洗特登去利x訂了）。
5. 好媽咪腸粉👍🏻（個皮滑過BB個面，我通常會先食一部分唔落豉油，食清楚個原味之後先加豉油，好重米香味一隻隻蝦肉好彈牙有蝦味，配搭埋叉燒啱啱好滿足到我哋呢啲咩都想食嘅人）。
6. 蒸飯，每次試唔同嘅蒸飯，全部蒸飯粒還粒好靚👍🏻試過黃鱔飯（可能因為蒸，所以啲黃鱔較為腍，但本身唔食黃鱔嘅仔仔食完覺得好食）、酸菜牛肉飯（本身諗緊會唔會好古怪，但原來兩者夾到喎，如果牛肉多番少少會好啲）、菜脯醬鳳爪排骨飯（唔使加豉油撈埋啲飯味道剛剛好）、蟲草花雲耳蒸雞飯（有薑蓉味嘅雞飯）、梅菜肉餅飯（啲肉餅唔係爛啤啤嗰種，不過如果可以多多少少肉餅會仲好）。
其他食物：
1. 蝦餃、燒賣啲蝦好新鮮，靚過好多其他地方👍🏻
2. 鮮竹卷一次好正，一次咸咗啲。
3. 狀元餃，有啲似小籠包，好多肉汁，不過個皮比起小籠包厚身少少，有少少似蒸鍋貼。
4. 黑松露野菌餃，好香啲菌味，個皮晶瑩通透，無論個皮定個餡都好食👍🏻
5. 棉花雞，$30大大嚿魚肚，正👍🏻
6. 流沙奶皇西多士/流沙奶皇包，入面個餡好香鹹蛋黃味，正👍🏻一開始係西多士，之前喺西環、天后周x食過味道口感差唔多，不過可能地區問題，周x貴啲，最近轉咗餐牌之後變成流沙奶皇包，餡一樣，不過要快少少食，如果凍咗個包皮會有少少乾，下次可能後加會好啲。
7. 香蕉包，個包皮好軟熟，入面真係有香蕉，小朋友好鍾意食。
8. 鴛鴦鮮蝦米網腸，有少少似春卷腸粉，但係個皮同春卷唔同，蝦肉好多👍🏻
9. 鹹水角，未轉餐牌之前係青咖喱鹹水角，轉左之後係普通鹹水角，雖然都好食，但係我個人都係鍾意一開始嘅青咖喱鹹水角多啲，比較有特色，問應該係老闆定經理，佢話因為好多老人家問佢有冇原味鹹咸水角，所以轉咗，個人希望三好考慮整返青咖喱鹹水角啦😝
10. 釀茄子，釀喺上面嗰層應該係加咗墨魚，厚厚的。
11. 薑汁糕，公公鍾意食，甜度剛剛好，我自己鍾意再多啲薑，不過小朋友話而家已經啱，如果唔係會好辣，所以唔同人口味都各有不同。
12. 千絲香芋酥，比較起炸鮮奶，我哋會鍾意後者多啲。
13. 排骨春菜煲，試過有一次鹹得好犀利，向店員反映過之後後來味道剛剛好。
我哋食到攬住個肚，每次都只係平均每人8、90蚊👍🏻
一間咁有心嘅點心店，咁勇敢喺疫市開店，值得我抽空寫吓食評，希望香港能保留多啲呢類小店啦🙏🏻
10 views
0 likes
0 comments
Post
