半島冰室

Open Now

Now Closed

睇MM介紹常餐，睇到呢一間即叫即斬嘅叉燒麵早餐，收工過炮台山試吓。一上枱就好驚喜，一睇就知啲叉燒即叫即切，冇預早切定嗰啲風乾嘅問題，食落去冧滑好味。個公仔麵都煮得好好，爽滑彈牙⋯⋯讚！早餐另外一樣例牌餸就係炒蛋，可惜呢間冰室嘅炒蛋係我食過嘅早餐常餐茶餐裏面，數一數二冇蛋味嘅炒蛋，冇味到我要加鹽，但係都只係多咗少少鹹味，吊唔起雞蛋味。而且佢最唔合格嘅地方係：佢啲蛋漿仲未完全攪勻，因為炒滑蛋嘅關係有少少半熟，就會出現嗰啲好似鼻涕一樣嘅蛋白，呢樣係我接受唔到嘅。整體嚟講，如果下次再去食我可能會食煎蛋，如果你鍾意食叉燒嘅話，個叉燒麵極推！！！而繁忙時間就要搭枱，出餐堪比澳牛咁快，所以就算排隊都應該好快入到去。另外我發現呢間冰室，有好多食物配搭口味都比較特別，因為隔離坐咗啲熟客喺度討論午餐個Menu，發現佢竟然有原隻蒸蟹嘅臘味肉餅飯。仲有粟米肉粒配生炸脆雞髀飯。⋯⋯等等，好鬼搞鬼，若果住喺附近又有興趣真係可以試吓。