誠記小籠包拉麵 (Moved) New Location

侍應態度幾好，不過落單唔用紙抄低之後又要番過黎問多次再覆單，然後佢竟然落錯左台號，野食每次都先去錯隔離台再傳番黎我台，足足4次，其實落錯台號唔緊要係溝通得好d就唔會咁尷尬。 簡單講重點，我係為左個酸辣湯而寫呢篇野既，個酸辣湯真係好重胡椒粉味，聽到隔離台食第1啖既反應同我一樣， 我開頭真係以為只係我果碗係咁，原來隔離都係，有d 失望。另外一碟酸菜魚都係好重胡椒粉味只係未至於酸辣湯咁勁，酸辣湯係成碗都係胡椒粉味。小籠包皮真係太厚喇汁又唔多，食兩粒好滯口，如果呢個厚度去整生煎包就差唔多，其實超市急凍小籠包都比佢薄皮，而且食落唔夠湯，味道都出唔到。 唯一醉雞係好食，好滑味道剛好，呢個係要一讚。酸辣湯，小籠包都可算係上海食店既標誌食品，希望真係要做好d整體價錢算合理，抱著想支持小店既心態入去，但食物品質要有一定改善。經營小店不易，香港人加油。