魂 (Closed)

前幾日同女朋友行過太子旺角警署嗰邊，佢話好想食拉麵，所以試咗呢間新開嘅拉麵，原來係喺銅鑼灣鵝頸橋嗰邊搬過嚟，都係呢幾日先開返。成個環境好舒服，裝修好有日本風，每人嗌咗一碗，啲麵同醬油又有得揀軟硬度同濃淡度，有啲似一蘭。我要咗太極，女朋友要咗魂，等咗一陣就嚟，速度都幾快。兩碗麵個豬骨湯底都好濃，值得留意嘅係佢嘅特色就係個湯底比一般湯底傑，幾有豬骨味，湯汁適中，又唔算太少，不過可以多啲。啲麵比其他拉麵更加粗，而且唔係直嘅，攣攣地咁，大概就好似出前一丁咁，女朋友就嫌太粗，不過我就幾鐘意，因為可以掛起更多湯汁，更加好食。兩碗麵都有一大片紫菜,叉燒同玉子(溏心蛋)，叉燒冇雪味，而且size都幾大，蛋都唔錯，唔會話熟過頭咁樣，聽老細講係之前用過唔少其他蛋，效果麻麻地，最後先用咗日本蛋，唔怪之得咁有蛋味，老細話最好大啖咁食，咁就會有清涼嘅感覺。麵質方面，我地要左硬嘅麵質，嚟到又真係硬嘅，醬油味道都幾適中，我嗰碗太極有埋蟹膏，同啲墨魚汁都夾，不過墨魚汁浸味就唔太出喇。總括嚟講，呢間舖又唔算太貴，食物質素又ok，都值得下次再去嘅。