Video
Read full review
2018-12-30
83 views
我同男朋友不嬲都中意食麻辣野，自從去左重慶之後就對重慶火鍋念念不忘，所以今次就決定試下呢間重慶過江龍！首先講下個環境，間餐廳都幾大，加上我地兩個人坐左張四人枱，啲座位好闊落，每張枱都有usb充電位，同埋有個小圍巾等啲汁唔好彈到件衫，好貼心既安排！另外每人都有兩對筷子，一對長既用黎淥野，另一對短既用黎食野。小食方面有花生同醃蒜頭食，蒜頭我興趣不大，但花生炒的幾香。今次我地叫左麻辣湯底(中辣)拼松茸野菌湯，雙拼係計貴啲嗰個湯再加$20，而本身呢兩個湯都係$160，所以雙拼就$180。雖然一開始都覺得偏貴，但黎到就覺得呢個質素黎講其實唔算貴。湯底上左之後侍應比左兩隻碗我地裝個菌湯飲，個湯底超濃郁，係出去就咁叫燉湯嗰隻味，同埋有好多菇係入面，完全唔係味精溝水嗰啲頹湯，果然一分錢一分貨！而個麻辣湯啲辣椒同花椒都超多，十分足料，但食野既時候要小心，成日食肉或者鵝腸嗰時會包住左個花椒，咬爆左之後搞到個口痺晒…調味料方面，枱面本身就有個調好左既醬料，入面有啲蒜蔥同麻油，正宗重慶火鍋就係麻辣湯淥完野之後點麻油，之前聽啲重慶人講咁樣食係可以等啲野食無咁熱同埋香啲，我係香港從來無見過呢隻咁正宗既食法，真係好
首先講下個環境，間餐廳都幾大，加上我地兩個人坐左張四人枱，啲座位好闊落，每張枱都有usb充電位，同埋有個小圍巾等啲汁唔好彈到件衫，好貼心既安排！另外每人都有兩對筷子，一對長既用黎淥野，另一對短既用黎食野。小食方面有花生同醃蒜頭食，蒜頭我興趣不大，但花生炒的幾香。
今次我地叫左麻辣湯底(中辣)拼松茸野菌湯，雙拼係計貴啲嗰個湯再加$20，而本身呢兩個湯都係$160，所以雙拼就$180。雖然一開始都覺得偏貴，但黎到就覺得呢個質素黎講其實唔算貴。湯底上左之後侍應比左兩隻碗我地裝個菌湯飲，個湯底超濃郁，係出去就咁叫燉湯嗰隻味，同埋有好多菇係入面，完全唔係味精溝水嗰啲頹湯，果然一分錢一分貨！而個麻辣湯啲辣椒同花椒都超多，十分足料，但食野既時候要小心，成日食肉或者鵝腸嗰時會包住左個花椒，咬爆左之後搞到個口痺晒…
調味料方面，枱面本身就有個調好左既醬料，入面有啲蒜蔥同麻油，正宗重慶火鍋就係麻辣湯淥完野之後點麻油，之前聽啲重慶人講咁樣食係可以等啲野食無咁熱同埋香啲，我係香港從來無見過呢隻咁正宗既食法，真係好似返左重慶食咁！同埋佢個調味料碟有兩邊，一邊比你放醬料，另一邊有個隔比你點完醬料之後放過去隔一隔啲油，食嗰時就唔會食到成口都係油。不過如果食唔慣點麻油都可以去自助醬料區嗰到自己調，有蔥、蒜、芫茜、辣辣醬、豉油、麻油……我食麻辣湯嗰時就點麻油，食菌湯就點豉油，個豉油甜甜地，都幾正！
之後終於到重頭戲，就係啲野食！我地叫左羊肉、重慶伸腿瘦鵝腸、鴕鳥肉、豬腦、娃娃菜、重慶小麵、五色小籠包、蝦滑同埋叫左杯冰粉。本身重叫左苕粉，但今日無晒，不過好彩無晒，因為今餐食到超飽，有埋苕粉應該會食唔晒。一開始叫完覺得可能會唔夠食，諗住食完一輪再叫，但個份量比想像之中多，所以如果兩個人食，再叫少啲都ok。
羊肉
$88
5 views
0 likes
0 comments
首先講下個羊肉，偏瘦，無乜蘇味但有羊肉既香味，麻辣湯淥超好食，同埋擺得好靚，呢碟野都幾多，四個人share都ok。
鴕鳥肉
$48
5 views
0 likes
0 comments
之後講下鴕鳥肉，今次係我第一次食鴕鳥肉，我覺得無論口感定味道都係介乎豬肉同牛肉之前，但鴕鳥肉比其他肉嫰，店員話煮兩三分鐘，但佢話煮耐左都唔緊要，因為會愈煮愈嫰，好神奇！有時真係煮到唔記得左佢，之後拎返上黎都重係好嫰。同埋佢醃得幾好食，我覺得下次黎都可以再叫。
重慶伸腿瘦鵝腿
$128
5 views
0 likes
0 comments
跟住講下鵝腸，佢有分兩隻，一隻係香港肥鵝腸，另一隻係重慶瘦鵝腸，咁食得重慶火鍋緊係試重慶嗰隻啦。店員話呢隻鵝腸左右拖十五下就食得，同埋佢地研發到呢隻鵝腸係可以熟左但唔會卷埋一齊，重係keep到直既，我就唔知點樣做到，但個口感的確比平時嗰到彈牙。同埋佢有啲冰係下面冰住啲鵝腸，上碟既時候重有個花係面，碟野靚食都食得開心啲，哈哈！
五色小籠包
14 views
0 likes
0 comments
五色小籠包係唯一一個寫住必食既野，咁緊係要試下啦！店員話呢個小籠包重係試驗階段，如果煮嗰時穿左會退返錢比我地，但煮左五個都無穿。今次係我第一次食唔係蒸既小籠包，五隻色代表唔同既味，黑色係黑松露、白色係原味、黃色係人參、橙色係蟹粉，重有隻我食完都唔知咩味，我覺得最好食既係黑松露味，好重黑松露味，正！佢唔似平時啲小籠包咁薄皮，始終因為要係湯到煮，所以皮既厚度同薄皮既水餃差唔多，同埋每粒咬開都有肉汁，味道幾鮮甜，整體係值得推薦既。不過我唔係隻隻味都咁中意，希望以後可以單點其中一隻味啦。
娃娃菜：切開左，呢個大細幾易熟同埋食得方便啲，我地全部都菌湯煮，好鮮甜，份量都幾足，叫一份菜兩個人食都已經好夠食。
蝦滑：啲蝦滑好彈牙，同埋有啲蝦肉係入面，增加左咬口，令到口感更有層次。我地煮煮下有店員過黎幫我地整，佢教我地每整完一舊都可以將隻匙羹浸一浸熱湯，咁就蝦滑就唔會痴住隻羹，用左呢個方法即刻好整左好多！同埋睇落雖然唔多，但唔知點解好似食極都重有，呢個質素黎講自己出去買可以都差唔多價錢。
重慶小麵
21 views
0 likes
0 comments
重慶小麵：好似同之前食既重慶小麵都質唔同，但都係彈牙好食既麵。第一舊放左係麻辣湯嗰邊煮，痴左一堆花椒同辣椒上黎，辣到頂唔順，所以第二舊就放左係菌湯嗰邊煮，煮熟先去麻辣湯嗰邊浸一浸，咁就差唔多啦。真係唔煮小麵都唔覺個湯原來咁辣。
豬腦
2 views
0 likes
0 comments
豬腦：男朋友唔食豬腦，所以我自己食晒兩舊，但麻辣豬腦真係超正！之前去重慶食嗰時，當地人教我地豬腦係一開始就放入去，食到最後先拎返出黎食，因為豬腦都要煮幾耐下，加上煮耐左都唔影響口感，所以我都係一黎就放係豬腦落去由佢煮，煮到索晒啲湯既精華，好香又好嫰，不過好多人都唔敢食豬腦，所以成日都要自己食，so sad…希望以後會搵到識欣賞豬腦既朋友同我一齊食啦！我個人覺得成晚最好食就係豬腦，麻辣火鍋必食！
冰粉：解辣消暑必食，之前去重慶日日都食兩三碗，今次第一次係香港食，呢間係將冰粉整到野飲咁，配啲花生芝麻果乾，配火鍋食幾得意既，尤其係食完個麻辣小麵之後，真係好彩有佢！同埋呢個冰粉本身係唔甜既，店員會另外比個紅糖水你自己加入去較甜度。
我地今次無叫酒，但我發現呢間野啲酒都幾平，啲啤酒都係廿幾蚊枝，Tower都係三百幾，重有清酒同紅酒飲，唔去吧黎呢到食下火鍋飲返兩杯都可以，我地應該係少數無飲酒既枱，因為當我知啲酒咁平既時候我地已經好飽，下次再黎要留肚飲返兩杯。
呢間野個餐牌每樣野食都有寫建議煮既時間，最啱我呢啲手殘一旅，成日都唔肯定熟未，又驚煮太耐唔好食。加上店員都好好，有時見你好迷惘都會過黎幫手睇下，又會教你點煮，又會幫手睇下熟未等，服務唔錯。同埋火鍋煮到少水既時候，店員會幫手加返湯，唔係就咁加水就算。同埋成日都會幫我地較火，我地全程都無理過個火，都係放心放比佢地。
整體黎講呢間野食物質素、環境同服務都好唔錯，價錢算偏貴，我地兩個人食連埋加一都要差唔多八百，但我地係叫得太多野食既，我估每人三百左右應該都已經夠飽，加上我地得兩個人，淨係湯底錢每人都$90，所以多人食應該會抵食好多。我覺得呢間野啱一班朋友一齊食，再小酌幾杯傾下計。或者懷念地道重慶火鍋既人都可以黎食下，始終香港地好少有啲咁正宗既火鍋，雖然貴左少少，但一分錢一分貨，我覺得咁既質素黎講其實都唔算貴既。
Post
