開心坊·親子餐廳 (Closed)

今日咁啱嚟到何文田做嘢，行下何文田廣場嘅時候，見到有間幾有特色嘅餐廳，而且入面好多一家大細，咁就入黎試下啦。一入門口，已經見到有唔少玩樂嘅設施，有足球機，又有唔少公仔，估唔到仲有switch玩添。呢個老火湯夠晒足料，而且飲落冇味精，有阿媽嘅味道啊。呢個番茄香辣蟹肉長通粉，食落唔算太辣，蕃茄味夠晒開胃，而且裏面有好多蟹肉。蟹肉食落感覺好新鮮，不過呢個長通粉辣辣地，可能唔係太啱小朋友食。我哋仲叫咗呢個肉眼扒，揀咗五成熟。一上枱已經聞到好香啦，除咗牛扒之外，仲有薯仔同埋青瓜伴碟。牛扒夠晒牛味之餘，又唔會太硬，小朋友都可以咬得爛呀。呢個羽衣甘藍汁真係好抵讚，因為除咗飲落夠晒健康之外，佢嘅飲管係紙飲管嚟㗎，真係夠晒環保。呢間餐廳又抵食又好玩，難怪咁多一家大細喺度啦。