後生仔海南雞1998 (Closed)

上次同朋友出開旺角 突然想食海南雞 一諗就諗起通菜街開左間專食海南雞既餐廳 就即刻行過去睇下有冇位 想試下 點知咁岩餐廳裝修冇得食 唯有下次再黎試下 咁岩今日又出旺角 就去睇下佢地開返未 去到餐廳唔洗等位 即刻入得 就同朋友一人叫一個招牌無骨海南雞飯試下 海南雞飯點可以冇黃油雞呢樣野 呢個係一個完美既配搭 少梗樣都差梗啲野 等左陣 兩個飯黎左喇 一黎到俾佢個份量嚇一嚇 飯既份量望落好大 好似好多咁 海南雞都有好多舊 黃油飯好香口 好夠味 食落唔算好油 海南雞冇骨 最中意食啖啖肉 海南雞啲肉好滑身 仲會配埋個酸酸甜甜既汁俾你點啲海南雞 好好味 開頭以為一個既份量會好多 但其實一個人食係岩岩好 值得一試