羅麥記 (荃新天地) (Closed)

如果想食高質嘅港式早餐，呢度係你嘅選擇。見到隔離米線陣同大家樂都坐滿人，疫情期間仍然希望可以同其他人有少少社交距離，所以一心就去食羅麥記。港式早餐每份$42，價錢同鄰舖有距離，我原先諗住係分別在於有少少私人空間。所以無人帶位，無人招呼亦問題不大。老實講，樓面人手真係少得可憐，同隔離大家樂差不多。但呢到樓面要一腳踢負責落單，派餐仲做埋清潔🧹。真係唔敢要求有招呼。等咗好耐終於有樓面得閒幫手落單，食物上檯就好快。質量仲有驚喜😅！炒蛋係澳牛炒滑蛋。仲要明顯分量唔只一隻。落單時可要求蛋嘅熟度，我叫咗反蛋，屋企人要熟蛋。兩碟都忠於要求無走樣。多士邊脆中間軟淋淋，非常之新鮮。沙爹牛算滑溜，雖然有少部份都係咬唔開，但已可收貨。蕃茄餐肉通，餐肉大大粒，大過波子，仲要全部都煎香晒先送湯。呢啲咪叫煮個位都有要求囉檸茶茶底香濃，屋企人飲奶茶，佢話好耐無試過飲到杯咗香濃滑溜嘅奶茶☕️⋯⋯總體而言，性價比高。食物質素高，又夠大份。