美味佳 (Closed)

好記得個電視機播嘅MV會隨着時代轉變，最跟得上潮流。曾幾何時阿姐應承過永遠唔落閘，但最近都開始落閘會休息。每次一去到，一定會等勁耐，等到肚餓第一樣叫嘅嘢就係蛋炒腸粉，因為喺即炒唔洗等，我食嘅蛋炒腸粉經歷過好多代，有唔同嘅阿姐炒過，味道始終如一如。最難忘嘅係，你望住姐姐們一路潑吓潑吓啲燒烤，最期待就係一大碟雞全翼喺你枱面，性價比極高。其他菜式，其實味道都差不多，但呢度真係大件夾抵食，娃娃菜、秋葵、韭菜、芥蘭，每一寸都好足料，唔會好似出面啲燒烤咁得幾條，保證你一定食得飽，食唔飽就叫串粟米。相信會食完再食，唔係因為個味道，而係因為食返學生時期嘅回憶，你會見返同一個阿姐燒雞翼俾你，就好似返返去學生時期咁樣。