伙食工業 (Closed)

聖誕假期想同朋友聚吓，專程再次黎呢度食吓飯。呢度嘅裝修好有心思，工業風牆身、水管、懷舊電影海報... 連廁所都好靚，如果第時有間屋嘅話都想參考吓啲佈置。餐牌有幾多選擇。蕃茄牛肉煲，牛肉同牛筋非常多，估計係三至四人份量黎。成個煲仲會有生菜同白飯附上，打開蓋個陣香氣四溢，牛筋都煮得非常冧，呢啲凍到打冷陣嘅天氣食到咁暖嘅野好幸福呢。牛肉麵非常足料！感覺冇吝嗇到牛肉，粗麵亦掛湯。牛筋同牛肉煲一樣，煮到好易咬開。魯肉飯嘅豬肉個人覺得肥瘦度剛剛好，但如果想食肥豬肉嘅話，呢個飯可能會有啲太瘦。而且肉躁量唔太夠送飯。但整體覺得都有台灣味道。瀂水拼盤非常大份，豬耳好爽口，雞翼、豆腐等都好入味。健康地叫碟蒜蓉炒A菜，唔太咸份量又多。黑松露薯條個醬太好食，幾乎唔記得仲有茄汁存在。加上咗調味粉後味道唔單調。甜品嘅芋圓入面仲加咗珍珠，非常大份，但冰就似乎係普通冰，如果係牛奶冰，溶咗之後味道唔會變淡就更好了。水蜜桃沙冰幾清新，就算係罐頭桃，加落沙冰都令人好滿足。因為位置幾僻，所以假日想搵個冇咩人嘅地方靜靜地坐吓，呢度係一個好選擇。