喜聚燒 (Closed)

今晚同朋友來到尖沙咀寶勒巷呢間喜聚燒食佢哋嘅招牌麻辣烏雞同埋燒海鮮。呢度地方唔算好大裝修有啲似日式居酒屋嘅風格。呢期佢哋仲有唔同優惠，成個星期每日唔同。我哋叫咗半隻台式麻辣風味嘅喜聚麻辣滋補鮮烏雞，份量足而且夠麻香又唔會太辣，好啱餸酒。另一個麻辣四姊妺，其實係蓮藕、淮山、萵筍同埋雲耳，麻、辣、鮮並重，幾開胃。海鮮方面蒜蓉燒就比較能夠品嘗到海鮮嘅鮮味，我哋揀咗蟶子皇、貴妃蚌同埋珍寶大扇貝，蒜香味突出得來又食到海鮮原來嘅鮮味。另外馬來西亞燒大蜆同埋新鮮脆皮白鱔都好高質，尤其係白鱔外脆內軟好好食。明太子釀雞翼同埋芝士焗意大利大磨菇亦都好啱我口味，特別係明太子雞翼入面釀滿明太子，少少香辣好惹味！