粵 (Closed)

大食會聚餐中，Uncle F提到近日於報章上睇到城市花園酒店入面間中菜廳「粵」已經連續幾年摘得米芝蓮一星，所以極之好奇地想去試一試。其中兩位會友亦和應地道出，佢地曾多次路經「粵」，想就咁行入去食個普通晚飯，點知每次都爆哂場 ，多年來都未有機會品嚐北角區一星中國菜。既然會友有要求，大家就立刻訂下日子，去大拆一餐。城市花園酒店鄰近炮台山地鐡站，附近亦有多個巴士、小巴、電車及的士站，食客於酒店餐廳內消費滿$600更可享有兩小時免費代客泊車服務，地點方便得很。酒店中菜廳「粵」設於二樓，走廊兩旁設有帳篷獨立卡位式及半大堂式散座，開揚通爽得黎不失雅觀別緻。餐店四周擺滿奬狀証書及廣告紙牌。我地月頭已訂好枱，當晚有幸認識到體貼有禮o既Jack哥哥。佢不但為大家打點餸菜及多項特別要求 ，更安排會員入座大房內近窗位置，燈光充裕，私隱度亦較其他位置高。XO仔訂座時已預先為各人叫咗兩款得奬菜及蟹蓋，到飯局當晚會友先跟隨Jack哥哥推介再點選其他餸。 七味脆豆腐（$78）：豆腐果真餸如其名，皮層鬆脆，七味香口，加上豆腐軟嫩滑溜，溶於口中，超正！ 蒜泥白切肉（$88）：小肥都係第一次食到咁薄o既蒜泥白肉！