屋子 (Closed)

實話實說：環境靚嘅，有用心整過，但係食緊嘢嗰陣有隻蚊飛來飛去。甜品真係OK唔錯，叫咗兩個PC狗蛋糕，我覺得都好好食，開心果醬好濃郁。但係將軍澳呢間真係唔知點解水準差D？我第一次食大圍嗰間分店，叫咗個三餸定食，我覺得幾好食，亦都夠味，但係今次將軍澳真係差咗啲，首先個蕃茄奶油燉雞無論係肉定係汁都係非常淡非常水，雞肉質地都係普通，白飯都係平平無奇，個中華沙律都係好普通，完全對唔住成百蚊嘅價錢。跟住我朋友叫咗嗰個豚肉拉麵，我食咗佢一塊豬肉叉燒，啲豬肉韌到一個點，仲有一舊咬唔爛嘅筋（？），我就冇食到佢個麵，但係聽朋友講話好鹹。一個又鹹一個又淡，唔知想點。我寧願食一汁一菜（觀塘某間日本定食餐廳）我哋邊食就邊吐槽，好彩最後食返個靚甜品救返心情。甜品雖然好食，但係都成百蚊一個（因為係合作甜品），所以都係唔抵食。所以有一個結論，就係下一次食屋子淨係食甜品好啦🙏🏻睇吓佢未來會唔會進步啦。