黃枝記 (Closed)

早兩日在電視上睇到一個重播飲食節目，介紹粤、港、澳既竹昇麵，好吸引！留意片尾發現有黃枝記。由於祖籍廣東既關係，從小對雲吞麵情有獨鍾，聽講黃枝記由澳門開到香港，今日經過銅鑼灣，一於尋味。位於謝斐道維安商業中心一、二樓，由於沒有地舖既關係，來到門口有接待處同醒目既餐牌。寬闊光猛既樓梯，前面兩位伯伯、婆婆行得比我仲快。店面予人舒適既感覺，沒有一般舊式雲吞麵鋪既迫挾和焗熱。店員熱情招呼坐下，好快送上一杯熱茶，睇下餐牌有好多不同既選擇。首選雲吞、蝦子撈麵，送油菜。傳統幼麵爽口彈牙，蛋味唔算太濃，但加入蝦子撈勻後，味道提升！好味！雲吞皮薄餡靚，內裡蝦仁鮮味爽脆！士多啤梨咕嚕肉，本人自小喜愛咕嚕肉，都想試試加入士多啤梨的味道如何。賣相已極吸引，外皮香脆，肉質帶爽，聽店員介紹原來是用左豬頸肉來做，而酸甜汁帶淡淡既士多啤梨味都算清新，如果再濃一點可能更好。炸鯪魚球，太好味！食完兩粒至記得影相，通常我都係試左原味先，外皮薄薄香脆 ，鯪魚肉味十足，點上蜆蚧醬既咸香，令味道更豐富！