浜燒太郎 (Closed)

將軍澳多咗好多海邊嘅餐廳，星期日帶住小朋友黎到，諗住隨便搵一間試試，點知6點半去到，間間餐廳都坐滿晒咁制，唔想等位又唯獨得呢間仲有位，一於諗住試試啦！餐廳環境幾日式，旁邊仲有得包廂，私隱度夠高！不過好明顯完全無做防疫措施，就連門口探熱都無！不過留意咗好耐，成間餐廳得一個樓面做野，安排位置又係佢，點菜同埋單又係佢，傳菜又係佢，就連浜燒開爐煮野都係佢，目測廚房都係得2-3個人。睇見佢都辛苦，但佢依然好淡定亦都保持禮貌。好彩我地算係最早嘅客人，上菜都算快！食物水準都算ok，但就無想encore嘅感覺。鹽燒椰菜，好味！自選壽司，左口魚裙邊值得一讚，燒得好好，咬落去啖啖油香，其他都係一般，正正常常！串燒：大蔥雞肉，豚肉鵪鶉蛋，牛舌豚肉鵪鶉蛋好食，鵪鶉蛋唔會過熟！其他味道略嫌淡咗少少。神奇炒麵，神奇在分唔到係咖喱味定醬油味，又有少少大阪燒味，小朋友好鐘意食，炒得唔錯！帶子魷魚燒，即係大阪燒，入面包住帶子同魷魚，好味！浜燒類剩係試咗魷魚筒及甲羅燒，因為個樓面太忙，佢都好有禮貌同我地解釋，話平時佢會幫手燒，但今日太忙，想我地自己燒返，佢擺完食物上去再教我地點燒，途中都有留意下我地燒熟未，服務都算係咁！