彩興來來火鍋 (Closed)

好少過黎將軍澳，難得過開黎，當然要食好西。帝景灣附近開左唔少食肆，而天氣呢排好凍，第一樣就諗一於打個邊爐!打邊爐 醬料同好既湯底就係不可或缺。醬料盤骨骨子子，款色多又乾淨，我中意。而湯底我地選左比較清既香茜皮蛋鍋。第一樣上既係$248 既極上肥牛！肥牛脂肪比平均，而且肉質好嫩。抵!響鈴！響鈴係火鍋店自家炸起，新鮮滾熱辣，脆口非常。脆骨腩~打邊爐點可以無脆骨腩！骨質結實彈牙，如果多幾舊就正!而今晚既主角就係呢個滿瀉既海鮮拼盤!$398食晒5款生猛海鮮！老闆仲話係親自去街市入貨!手掌咁大貴妃蚌，洗得好乾淨，而且好新鮮。肥美廣島蠔， 大到遮左d鮑魚仔。花甲一樣不錯。基圍蝦上枱落鍋仲郁緊。成晚最岩就係叫呢個海鮮拼盤，到宜家都回味中。